ეკლესიის სოციალური სწავლების ცენტრი
ცენტრის მიზანი
ეკლესიის სოციალური სწავლების ცენტრი მიზნად ისახავს ეკლესიის სოციალური სწავლების პოპულარიზებას საზოგადოებაში და მის ეტაბლირებას ქართულ საგანმანათლებლო სივრცეში. ამისათვის ცენტრი განახორციელებს პროექტებს როგორც აკადემიური (შესაბამის საკითხებზე ლიტერატურის გამოცემა, სემინარებისა და კონფერენციების ორგანიზება, სასწავლო პროგრამების შემუშავება), ისე პრაქტიკული მიმართულებით (ტრენინგების ორგანიზება, ფართო მასებში სწავლების შუამდგომლობა სხვადსხვა ინსტრუმენტარიუმებით).
რა პრინციპებს ეყრდნობა ეს სწავლენა
ამისათვის ეკლესია ცდილობს საკუთარი მრწამსიდან გამომდინარე და ყველა ადამიანის რწმენის თავისუფლებისა და კულტურული განსაკუთრებულობის გათვალისწინებით წინა პლანზე წამოსწიოს ის ძირითადი პრინციპები, რომელის გარეშეც საზოგადოებას ჰუმანურს ვერ ვუწოდებთ. ეს პრინციპებია: საზოგადო სიკეთისათვის ზრუნვა, ადამიანის პიროვნულობის ხაზგასმა, სოლიდარულობა და სუბსიდიარულობა.
ეკლესიის სოციალური სწავლება არაა წმინდად თეოლოგიური მოძღვრება, თუმცა მას საფუძვლად უდევს ის თეოლოგიური ხედვა, რომელიც განაპირობებს საზოგადოების თანაცხოვრების პრინციპებს. იგი განიხილავს საზოგადოების ცხოვრების ისეთ ფუნდამენტურ საკითხებს, როგორიცაა პიროვნების უფლება, ოჯახის ადგილი საზოგადოებაში, ადამიანის სამუშაოს ღირსება, ეთიკისა და მორალის აუცილებლობა ეკონომიკასა და პოლიტიკაში, საერთაშორისო ურთიერთობების გავლენა მშვიდობისა და თავისუფლების დასამყარებლად და ა.შ.